ଭୁବନେଶ୍ୱର/ପୁରୀ, ୩୦ ଜୁଲାଇ: ପୁରୀ ଜିଲ୍ଲା ବ୍ରହ୍ମଗିରି ତହସିଲରେ ଲାଞ୍ଚ କାରବାର ବିରୋଧରେ ଓଡ଼ିଶା ଭିଜିଲାନ୍ସ ବଡ଼ ସଫଳତା ହାସଲ କରିଛି। ତହସିଲ କାର୍ଯ୍ୟାଳୟର ଜୁନିୟର କ୍ଲାର୍କ (ରେକର୍ଡ କିପର) ନରେନ୍ଦ୍ର କୁମାର ସାହୁ ଓ ଡ୍ରାଇଭର ଜିତେନ୍ଦ୍ର କୁମାର ସାହୁଙ୍କୁ ପ୍ଲଟ ଡିମାର୍କେସନ ସମ୍ବନ୍ଧୀୟ ନୋଟିସ ଜାରି ଓ ସର୍ଭିସ କରିବା ପାଇଁ ୨୦ ହଜାର ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ହାତେନାତ ଧରିଛି।
ସୂଚନା ଅନୁସାରେ, ଅଭିଯୋଗକାରୀ ଗତ ୩ ଏପ୍ରିଲ ୨୦୨୬ ରେ ରାଜ୍ୟ ସରକାରଙ୍କ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ନିୟମ ଅନୁଯାୟୀ ଅନଲାଇନ୍ ମାଧ୍ୟମରେ ପ୍ଲଟ ଡିମାର୍କେସନ ପାଇଁ ଆବେଦନ କରିଥିଲେ। ଅଭିଯୋଗ ଅନୁସାରେ, ପ୍ରକ୍ରିୟା ଆରମ୍ଭ କରିବା ପାଇଁ ନରେନ୍ଦ୍ର କୁମାର ସାହୁ ପୂର୍ବରୁ ୮ ହଜାର ଟଙ୍କା ନେଇଥିଲେ। ତଥାପି କାମ ଆଗକୁ ବଢ଼ାଇ ନଥିବା ସହ ପରବର୍ତ୍ତୀ ସମୟରେ ଆଉ ୨୦ ହଜାର ଟଙ୍କା ଲାଞ୍ଚ ଦାବି କରିଥିଲେ।
ଏହାରେ ଅତିଷ୍ଠ ହୋଇ ଅଭିଯୋଗକାରୀ ଓଡ଼ିଶା ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ଯୋଜନାବଦ୍ଧ ଭାବେ ଆଜି ଭିଜିଲାନ୍ସ ଟିମ୍ ବ୍ରହ୍ମଗିରି ତହସିଲ କାର୍ଯ୍ୟାଳୟରେ ଚଢ଼ାଉ କରି ନରେନ୍ଦ୍ର କୁମାର ସାହୁ ଓ ଜିତେନ୍ଦ୍ର କୁମାର ସାହୁଙ୍କୁ ୨୦ ହଜାର ଟଙ୍କା ଲାଞ୍ଚ ଗ୍ରହଣ କରୁଥିବା ବେଳେ କାବୁ କରିଥିଲା। ସେମାନଙ୍କ ନିକଟରୁ ସମ୍ପୂର୍ଣ୍ଣ ୨୦ ହଜାର ଟଙ୍କାର ଦାଗି ନୋଟ ଜବତ କରାଯାଇଛି।
ଫାନ୍ଦ ସଫଳ ହେବା ପରେ ନରେନ୍ଦ୍ର କୁମାର ସାହୁଙ୍କ ସହ ଜଡିତ ଦୁଇଟି ସ୍ଥାନରେ ଆୟବହିର୍ଭୂତ ସମ୍ପତ୍ତି (ଡିଏ) ଦୃଷ୍ଟିକୋଣରୁ ଏକକାଳୀନ ଚଢ଼ାଉ ଜାରି ରହିଛି।
ଏହି ଘଟଣାରେ ଭୁବନେଶ୍ୱର ଭିଜିଲାନ୍ସ ଥାନା କେସ୍ ନଂ–୧୭, ତାରିଖ ୨୯.୦୭.୨୦୨୬, ଦୁର୍ନୀତି ନିବାରଣ (ସଂଶୋଧନ) ଆଇନ, ୨୦୧୮ର ଧାରା–୭ ଅନୁଯାୟୀ ମାମଲା ରୁଜୁ କରାଯାଇଛି। ଉଭୟ ଅଭିଯୁକ୍ତଙ୍କ ବିରୋଧରେ ତଦନ୍ତ ଜାରି ରହିଛି।
ଉଲ୍ଲେଖଯୋଗ୍ୟ ଯେ, ନରେନ୍ଦ୍ର କୁମାର ସାହୁ ଏହା ପୂର୍ବରୁ ମଧ୍ୟ କୃଷିଜମିକୁ ବସତି ଜମିରେ ପରିବର୍ତ୍ତନ କରାଇବା ପାଇଁ ୧୮ ହଜାର ଟଙ୍କା ଲାଞ୍ଚ ନେବା ଅଭିଯୋଗରେ ଭିଜିଲାନ୍ସ ଦ୍ୱାରା ଗିରଫ ହୋଇଥିଲେ। ପୁନର୍ବାର ଲାଞ୍ଚ ନେବା ଘଟଣାରେ ଧରାପଡ଼ିବା ପରେ ଏହି ଘଟଣା ରାଜସ୍ୱ ବିଭାଗରେ ଚର୍ଚ୍ଚାର ବିଷୟ ପାଲଟିଛି।
