ସତ୍ୟବାଦୀ: ୪/୮/୨୦୨୬ – ନି:ପ୍ର – ସତ୍ୟବାଦୀ କମ୍ୟୁନିଟି ହେଲ୍ଥ ସେଣ୍ଟର (CHC) ରେ ବ୍ଲକ ପ୍ରୋଗ୍ରାମ ମ୍ୟାନେଜର (BPM) ଭାବେ ଶ୍ରୀ ଜ୍ୟୋତି ରଞ୍ଜନ ଶତପଥୀ ପ୍ରାୟ ୮ ବର୍ଷ ଧରି କାର୍ଯ୍ୟରତ ଥିବା ଘଟଣାକୁ ନେଇ ଏବେ ପ୍ରଶାସନିକ ମହଲରେ ଚର୍ଚ୍ଚା ଜୋର ଧରିଛି। ସରକାରୀ ନିର୍ଦ୍ଦେଶାବଳୀ ଅନୁଯାୟୀ ସାଧାରଣତଃ ଏକ କର୍ମଚାରୀଙ୍କୁ ଏକା ସ୍ଥାନରେ ୩ ବର୍ଷରୁ ଅଧିକ ସମୟ ରଖାଯାଏ ନାହିଁ। ତେବେ ୮ ବର୍ଷ ଧରି ଏକା ସ୍ଥାନରେ, ଶ୍ରୀ ଜ୍ୟୋତି ରଞ୍ଜନ ଶତପଥୀ କାର୍ଯ୍ୟରତ ରହିବା ପଛରେ କାହାର ଆଶୀର୍ବାଦ ରହିଛି ବୋଲି ସ୍ଥାନୀୟ ମହଲରେ ପ୍ରଶ୍ନ ଉଠୁଛି।
ଏହି ପ୍ରସଙ୍ଗରେ ୧୯ ଜୁନ୍ ୨୦୨୬ ତାରିଖରେ ସାନମାର୍ଗ, ପୁରୀର ଜିଲ୍ଲା ସମ୍ବାଦଦାତା ବିଷ୍ଣୁଦତ୍ତ ଦାସ ପୁରୀ ଜିଲ୍ଲାପାଳଙ୍କ ନିକଟରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ଜିଲ୍ଲାପାଳ ତୁରନ୍ତ ଏହି ଘଟଣାରେ ପଦକ୍ଷେପ ନେବାକୁ CDMO, ପୁରୀଙ୍କୁ ନିର୍ଦ୍ଦେଶ ଦେଇଥିବା ଜଣାପଡ଼ିଛି। କିନ୍ତୁ ଅଭିଯୋଗର ଦୀର୍ଘ ସମୟ ବିତିଯାଇଥିଲେ ମଧ୍ୟ କୌଣସି ଦୃଶ୍ୟମାନ କାର୍ଯ୍ୟାନୁଷ୍ଠାନ ହୋଇନଥିବା ଅଭିଯୋଗ ହେଉଛି। ସୂଚନା ଅନୁସାରେ, CDMO ଙ୍କ ପକ୍ଷରୁ “ଟ୍ରାନ୍ସଫର ସମୟ ସରିଯାଇଛି, ବର୍ତ୍ତମାନ ବଦଳି ସମ୍ଭବ ନୁହେଁ” ବୋଲି କୁହାଯାଉଛି।
ଯଦି ନିୟମ ସମସ୍ତଙ୍କ ପାଇଁ ସମାନ, ତେବେ ୮ ବର୍ଷ ଧରି ଏକାସ୍ଥାନରେ ରହିବା କିପରି ସମ୍ଭବ ହେଲା? ଜିଲ୍ଲାପାଳଙ୍କ ନିର୍ଦ୍ଦେଶ ପରେ ମଧ୍ୟ କାର୍ଯ୍ୟାନୁଷ୍ଠାନ କାହିଁକି ହେଲା ନାହିଁ? ଏହା କେବଳ ପ୍ରଶାସନିକ ଅବହେଳା, ନା ଏହା ପଛରେ କୌଣସି ରାଜନୈତିକ ପ୍ରଭାବ କିମ୍ବା ପ୍ରଭାବଶାଳୀ ବ୍ୟକ୍ତିଙ୍କ ଚାପ ରହିଛି? ଏଭଳି ପ୍ରଶ୍ନ ଏବେ ସାଧାରଣ ଲୋକଙ୍କ ମଧ୍ୟରେ ଆଲୋଚନାର ବିଷୟ ପାଲଟିଛି।
ଏହା ମଧ୍ୟରେ ଅଭିଯୋଗକାରୀ ବିଷ୍ଣୁଦତ୍ତ ଦାସଙ୍କ କହିବା ଅନୁସାରେ, ୨୩ ଜୁନ ୨୦୨୬ ରଥଯାତ୍ରା ପ୍ରସ୍ତୁତି ବୈଠକ ପରେ ସେ CDMOଙ୍କୁ ଏହି ପ୍ରସଙ୍ଗରେ ପ୍ରଶ୍ନ କରିଥିଲେ। ସେତେବେଳେ CDMO କହିଥିବା ଅଭିଯୋଗ ହେଉଛି ଯେ, “ଜିଲ୍ଲାପାଳ ମହୋଦୟଙ୍କ ନିର୍ଦ୍ଦେଶରେ ମାତ୍ର ଏହି କାର୍ଯ୍ୟ କରାଯାଇପାରିବ ନାହିଁ; ସତ୍ୟବାଦୀ ବିଧାୟକଙ୍କ ସହ ଆଲୋଚନା କରି ନିଷ୍ପତ୍ତି ନିଆଯିବ।” ଏହି ଦାବି ସତ୍ୟ ହୋଇଥିଲେ, ପ୍ରଶାସନିକ ବଦଳି ପ୍ରକ୍ରିୟାରେ ଜନପ୍ରତିନିଧିଙ୍କ ଭୂମିକାକୁ ନେଇ ମଧ୍ୟ ପ୍ରଶ୍ନ ଉଠୁଛି।
ଏହି ପ୍ରସଙ୍ଗରେ ଅଭିଯୋଗକାରୀ ତଥା ସାନମାର୍ଗ, ପୁରୀର ଜିଲ୍ଲା ସମ୍ବାଦଦାତା ବିଷ୍ଣୁଦତ୍ତ ଦାସ ପ୍ରଶ୍ନ ଉଠାଇଛନ୍ତି, “ପ୍ରଶାସନିକ ବ୍ୟବସ୍ଥାରେ ପ୍ରକୃତରେ କାହାର କ୍ଷମତା ଅଧିକ—ଜିଲ୍ଲାପାଳଙ୍କର ନା ସତ୍ୟବାଦୀ ବିଧାୟକଙ୍କର?” ତାଙ୍କ କହିବା ଅନୁସାରେ, ଯଦି ଜିଲ୍ଲାପାଳଙ୍କ ନିର୍ଦ୍ଦେଶ ପରେ ମଧ୍ୟ ଏହି ପ୍ରସଙ୍ଗରେ CDMO ଆବଶ୍ୟକ ପଦକ୍ଷେପ ଗ୍ରହଣ ନକରନ୍ତି, ତେବେ ସେ ଏହି ବିଷୟକୁ ରାଜ୍ୟର ସ୍ୱାସ୍ଥ୍ୟମନ୍ତ୍ରୀ ଏବଂ ମୁଖ୍ୟମନ୍ତ୍ରୀଙ୍କ ଦୃଷ୍ଟିକୁ ଆଣିବେ ବୋଲି କହିଛନ୍ତି।
ତେବେ ଏହି ସମ୍ପର୍କରେ ସମ୍ପୃକ୍ତ ପ୍ରଶାସନିକ ଅଧିକାରୀ କିମ୍ବା ଜନପ୍ରତିନିଧିଙ୍କ ପକ୍ଷରୁ କୌଣସି ଆଧିକାରିକ ପ୍ରତିକ୍ରିୟା ମିଳିନାହିଁ। ସେମାନଙ୍କ ପକ୍ଷରୁ ସ୍ପଷ୍ଟୀକରଣ ଆସିଲେ ତାହାକୁ ମଧ୍ୟ ଗୁରୁତ୍ୱର ସହ ପ୍ରକାଶ କରାଯିବ। ତେଣୁ ଏହି ବିବାଦ ଆଗାମୀ ଦିନରେ ଆହୁରି ଚର୍ଚ୍ଚାର ବିଷୟ ହେବ ବୋଲି ଅନୁମାନ କରାଯାଉଛି।
