ପୁରୀ (୨୯/୧୦) : ପୁରୀ ସହରବାସୀଙ୍କୁ ପୂର୍ବପରି ଶ୍ରୀମନ୍ଦିର ପ୍ରବେଶ ଓ ମହାପ୍ରଭୁ ଶ୍ରୀଜଗନ୍ନାଥଙ୍କ ଦର୍ଶନ ଦାବିରେ ଚାଲିଥିବା ସଚେତନତା ପଦଯାତ୍ରା ଆଜି ୨୧୨ ଦିନରେ ପହଞ୍ଚିଛି। ଝିପିଝିପି ବର୍ଷା ଜନଜୀବନକୁ ପ୍ରଭାବିତ କରୁଥିବା ସତ୍ତ୍ୱେ ଏହି ଆନ୍ଦୋଳନରେ ସାମିଲ ସତ୍ୟାଗ୍ରହୀମାନେ ପଛକୁ ହଟିନାହାନ୍ତି। ନିଜର ନ୍ୟାଯ୍ୟ ଦାବି ପୂରଣ ପାଇଁ ସେମାନେ ଦୃଢ଼ ମନୋବଳ ସହ ଶାନ୍ତିପୂର୍ଣ୍ଣ ପ୍ରତିବାଦ ଜାରି ରଖିଛନ୍ତି।
ଗତ ୧ ଏପ୍ରିଲ ଉତ୍କଳ ଦିବସ ଶ୍ରୀଗୁଣ୍ଡିଚା ମନ୍ଦିରରୁ ଏହି ଅଭିଯାନର ଆରମ୍ଭ ହୋଇଥିଲା। ପରଦିନ ବଳଗଣ୍ଡିସ୍ଥିତ ଭକ୍ତ ସାଲବେଗ ପୀଠରୁ ପଦଯାତ୍ରା ଆଗକୁ ବଢ଼ିଥିଲା। ଏହାପରଠାରୁ ପ୍ରତିଦିନ ପଦଯାତ୍ରୀମାନେ ସିଂହଦ୍ୱାର ସମ୍ମୁଖରେ ଉପସ୍ଥିତ ରହି ପୁରୀବାସୀଙ୍କ ଦାବିକୁ ଜନସାଧାରଣ ଓ ସରକାରଙ୍କ ଦୃଷ୍ଟିକୁ ଆଣିବାକୁ ଉଦ୍ୟମ କରୁଛନ୍ତି। ଦୀର୍ଘ ୨୧୨ ଦିନର ଏହି ନିରବଚ୍ଛିନ୍ନ ପ୍ରୟାସ ସତ୍ୟ ଓ ଅହିଂସା ମାଧ୍ୟମରେ ଅଧିକାର ହାସଲ କରିବାର ଏକ ଉଦାହରଣ ହୋଇଛି।
ପଦଯାତ୍ରାର ଆବାହକ ଶ୍ରୀ ସ୍ୱାଧୀନ କୁମାର ପଣ୍ଡାଙ୍କ ମତରେ, ପୁରୀବାସୀଙ୍କ ଦୀର୍ଘଦିନର ଏହି ଦାବିକୁ ଅଣଦେଖା କରାଯିବା ଉଚିତ ନୁହେଁ। ପୁରୀବାସୀଙ୍କ ପାଇଁ ଶ୍ରୀମନ୍ଦିର ପ୍ରବେଶ ଏବଂ ଦର୍ଶନ ନିମନ୍ତେ ଏକ ସ୍ଥାୟୀ ବ୍ୟବସ୍ଥା କରାଯିବା ଆବଶ୍ୟକ। ଏହି ଦାବିର ସମାଧାନ ନହେବା ପର୍ଯ୍ୟନ୍ତ ସତ୍ୟାଗ୍ରହ ଚାଲୁ ରହିବ। ପ୍ରତିକୂଳ ପାଗ ହେଉ କି ଅନ୍ୟ କୌଣସି ବାଧା, ଆନ୍ଦୋଳନର ଲକ୍ଷ୍ୟ ଓ ଅହିଂସାର ମାର୍ଗରୁ ସତ୍ୟାଗ୍ରହୀମାନେ ଓହରିବେ ନାହିଁ। ଏହି ଆନ୍ଦୋଳନ କାହା ବିରୋଧରେ ନୁହେଁ; ପୁରୀବାସୀଙ୍କ ଧାର୍ମିକ ଅଧିକାର ଓ ସ୍ୱାଭିମାନର ସୁରକ୍ଷା ହିଁ ଏହାର ପ୍ରମୁଖ ଉଦ୍ଦେଶ୍ୟ।
ଆଜିର ପଦଯାତ୍ରାରେ ସର୍ବଶ୍ରୀ ହରିଶଙ୍କର ମିଶ୍ର, ଚକ୍ରଧର ମହାପାତ୍ର, ସୁକାନ୍ତ ପଣ୍ଡା, ବିଶ୍ୱନାଥ ମିଶ୍ର, ନୃସିଂହନାଥ ନାୟକ, ରମେଶ ଚନ୍ଦ୍ର ମହାନ୍ତି, ଅରୁଣା ପଟ୍ଟନାୟକ, ଅଞ୍ଜୁବାଳା ମହାନ୍ତି, ଭାରତୀ ମହାନ୍ତି, ସୀତା ନାୟକ, ଚାନ୍ଦିନୀ ମୁଦୁଲି, ବିପାଶା ସିଂହ, କଣ୍ଢେଇ ପ୍ରଧାନ, ମମତା ସ୍ୱାଇଁ, ଅଭିମନ୍ୟୁ ରାୟଗୁରୁ, କିଶୋର ଚନ୍ଦ୍ର ଦାସ, ପ୍ରସନ୍ନ କୁମାର ନାଥ, ଯାଦବାନନ୍ଦ ରାୟ, ପ୍ରକାଶ ଚନ୍ଦ୍ର ନାୟକ, ମନୋରଞ୍ଜନ ରଣସିଂହ, ସନ୍ତୋଷ ସେନାପତି ଓ ମାନସ ପଟ୍ଟନାୟକଙ୍କ ସମେତ ଅନ୍ୟ ପଦଯାତ୍ରୀମାନେ ଯୋଗଦେଇଥିଲେ। ବର୍ଷା ସତ୍ତ୍ୱେ ସେମାନେ ଏକତ୍ରିତ ହୋଇ ଦାବି ପ୍ରତି ନିଜର ଦୃଢ଼ ସମର୍ଥନ ପ୍ରକାଶ କରିଥିଲେ।
ଜୟ ଜଗନ୍ନାଥ! 🙏
