ପୁରୀ, ୦୪ ଫେବୃଆରୀ: ପୁରୀ ଜିଲ୍ଲା ଗୋପ ବ୍ଲକ୍ ଅନ୍ତର୍ଗତ କୁଶୁପୁର ଗ୍ରାମ ନିକଟରେ ଅବସ୍ଥିତ କୁଶଭଦ୍ରା ନଦୀକୂଳରେ ପ୍ରାକୃତିକ ଭାବେ ଜମା ହୋଇଥିବା ବାଲିକୁ ପ୍ରଧାନମନ୍ତ୍ରୀ ଆବାସ ଯୋଜନା (ପିଏମଏୱାଇ) ଲାଭାର୍ଥୀଙ୍କୁ ମାଗଣାରେ ବ୍ୟବହାର କରିବା ପାଇଁ ବିଜେପି କୃଷକ ମୋର୍ଚ୍ଚା ଓଡ଼ିଶାର ରାଜ୍ୟ ସମ୍ପାଦକ ପ୍ରଶାନ୍ତ ସ୍ୱାଇଁ (ଲୁଲୁ)ରାଜ୍ୟ ସରକାରଙ୍କୁ ଲିଖିତ ଅନୁରୋଧ ଜଣାଇଛନ୍ତି।
ତାଙ୍କ ଆବେଦନ ଅନୁଯାୟୀ, ଖାତା ନମ୍ବର ୬୬୬ ଅଧୀନରେ ଥିବା ୧୨ଟି ପ୍ଲଟ୍ (ମୋଟ ପ୍ରାୟ ୫.୬୬ ହେକ୍ଟର) ସହ ନଦୀକୂଳ ଅଞ୍ଚଳରେ ବ୍ୟାପକ ପରିମାଣରେ ବାଲି ଜମା ହୋଇଛି। ଭୂଲେଖ୍ ରେକର୍ଡ ଓ ଫରେଷ୍ଟ ଲୋକେସନ୍ ପୋର୍ଟାଲ୍ ଅନୁସାରେ ଏହି ଜମି ସରକାରୀ ଶ୍ରେଣୀରେ ରହିଥିବା ବେଳେ ଏହା କୌଣସି ଅରଣ୍ୟ ଭୂମି ନୁହେଁ। ସ୍ୟାଟେଲାଇଟ୍ ଚିତ୍ରରେ ନଦୀ ମଧ୍ୟରେ ବାଲି ବାର୍ ସ୍ପଷ୍ଟ ଭାବେ ଦେଖାଯାଉଥିବା ଉଲ୍ଲେଖ କରାଯାଇଛି।
ପ୍ରଶାନ୍ତ ସ୍ୱାଇଁ କହିଛନ୍ତି ଯେ, ଏହି ବାଲି ଦୀର୍ଘଦିନ ଧରି ଅବ୍ୟବହୃତ ରହିଲେ ନଦୀ ପ୍ରବାହରେ ବାଧା ସୃଷ୍ଟି ହେବା ସହ ପରିବେଶ ଉପରେ କୁପ୍ରଭାବ ପଡ଼ିପାରେ। ତେଣୁ ବୈଜ୍ଞାନିକ ଓ ପରିବେଶ-ଅନୁକୂଳ ପଦ୍ଧତିରେ ବାଲି ଉତ୍ତୋଳନ କରି କୁଶୁପୁର ସହ ଆଖପାଖ ଅଞ୍ଚଳର ପିଏମଏୱାଇ ଲାଭାର୍ଥୀଙ୍କୁ ମାଗଣାରେ ଯୋଗାଇଦେବା ପାଇଁ ସେ ପ୍ରସ୍ତାବ ରଖିଛନ୍ତି। ଏହି ପ୍ରସ୍ତାବ ରାଜ୍ୟ ସରକାରଙ୍କ ବର୍ତ୍ତମାନ ନୀତି ସହ ସମ୍ପୂର୍ଣ୍ଣ ସମନ୍ୱୟ ରଖୁଥିବା ଉଲ୍ଲେଖ କରାଯାଇଛି। ୨୦୨୫ ଜୁନ୍ ମାସରେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୁଜାରୀ ଘୋଷଣା କରିଥିଲେ ଯେ ପ୍ରତ୍ୟେକ ପିଏମଏୱାଇ ଲାଭାର୍ଥୀଙ୍କୁ ୨ଟି ଟ୍ରାକ୍ଟର ବୋଝା ବାଲି ମାଗଣାରେ ଯୋଗାଇ ଦିଆଯିବ ଓ ଏହା ପାଇଁ ପରମିଟ୍ ଜାରି କରାଯିବ।
ସେହିପରି ଓଡ଼ିଶା ମାଇନର ମିନରାଲ୍ କନ୍ସେସନ୍ ରୁଲ୍ସ–୨୦୧୬ (୨୦୨୫ ସଂଶୋଧନ) ଓ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ୍ର ୦୫.୦୭.୨୦୨୪ ଗାଇଡ୍ଲାଇନ୍ରେ ଡିପୋଜିସନ୍ ଜୋନ୍ରେ ବୈଜ୍ଞାନିକ ଓ ମ୍ୟାନୁଆଲ୍ ଖନନର ବ୍ୟବସ୍ଥା ରହିଛି। ପ୍ରଶାସନ ଏହି ପଦକ୍ଷେପକୁ କାର୍ଯ୍ୟକାରୀ କଲେ ଶତାଧିକ ଗରିବ ପରିବାର ମାଗଣାରେ ବାଲି ପାଇବେ, ଅବୈଧ ବାଲି ଖନନ ରୋକାଯିବ ଓ ନଦୀ ପରିଚାଳନା ବୈଜ୍ଞାନିକ ଭିତ୍ତିରେ ସମ୍ଭବ ହେବ ବୋଲି ଉଲ୍ଲେଖ କରାଯାଇଛି।
ଏନେଇ ପ୍ରଶାନ୍ତ ସ୍ୱାଇଁ ଜିଲ୍ଲାପାଳ, ସମ୍ବନ୍ଧିତ ତହସିଲଦାର ଓ ଖନନ ଅଧିକାରୀଙ୍କୁ ସାଇଟ୍ରେ ଯୁଗ୍ମ ପରିଦର୍ଶନ,ବିଶେଷ ଅନୁମତି କିମ୍ବା କ୍ୱାରୀ ପରମିଟ୍ ଜାରି, ରାଜସ୍ୱ, ଖନନ, ପ୍ରଦୂଷଣ ନିୟନ୍ତ୍ରଣ ଓ ପଞ୍ଚାୟତରାଜ ବିଭାଗର ସମନ୍ୱୟରେ କମିଟି ଗଠନ,
ଏବଂ ପରିବେଶ ମାନଦଣ୍ଡର କଠୋର ପାଳନ ପାଇଁ ଅନୁରୋଧ କରିଛନ୍ତି।
ସେ ମୁଖ୍ୟମନ୍ତ୍ରୀଙ୍କ ‘ସମସ୍ତଙ୍କ ପାଇଁ ଘର’ ଦର୍ଶନକୁ ସମର୍ଥନ କରି ସ୍ୱଚ୍ଛ, ପାରଦର୍ଶୀ ଓ ପରିବେଶ-ଅନୁକୂଳ ସମ୍ପଦ ପରିଚାଳନା ପାଇଁ ଏହି ପଦକ୍ଷେପ ନେବାକୁ ଆହ୍ଵାନ କରିଛନ୍ତି। ଏହି ଆବେଦନ ସହ ଜମିର କପି, ଫରେଷ୍ଟ ଲୋକେସନ୍, ସ୍ୟାଟେଲାଇଟ୍ ଚିତ୍ର ଓ ସରକାରୀ ଘୋଷଣାର ପ୍ରତିଲିପି ସଂଲଗ୍ନ କରାଯାଇଛି।
