ଭୁବନେଶ୍ୱର: ୧୬/୨/୨୦୨୬ (ନି:ପ୍ର) – ଭୁବନେଶ୍ୱରର ପ୍ରଦର୍ଶନୀ ପଡିଆରେ ଆସନ୍ତା ୨୦ ଓ ୨୧ ଫେବୃଆରୀରେ ପ୍ରଥମଥର ପାଇଁ ‘ଗ୍ଲୋବାଲ୍ କ୍ଲିନ୍ଟେକ୍ ଏକ୍ସପୋ–ଓଡ଼ିଶା ୨୦୨୬’ ଆୟୋଜିତ ହେବ। ଏହା ଓଡ଼ିଶାରେ ପ୍ରଥମ ଏବଂ ପୂର୍ବ ଭାରତର ସର୍ବବୃହତ କ୍ଲିନ୍ଟେକ୍ ପ୍ରଦର୍ଶନୀ ଭାବେ ଗଣ୍ୟ ହେବ ବୋଲି ଆୟୋଜକମାନେ କହିଛନ୍ତି।
ଏହି ସମ୍ପର୍କରେ ରେ ପ୍ରାଚୀ ହୋଟେଲରେ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା। ନେଟ୍ ଜିରୋ ଆସୋସିଏସନର ନିର୍ଦ୍ଦେଶକ ଦେବୀ ପ୍ରସାଦ ଦାଶ, ଓଡ଼ିଶା କ୍ଲିନ୍ଟେକ୍ ଆସୋସିଏସନର ସଭାପତି ପ୍ରଶାନ୍ତ ପାଣିଗ୍ରାହୀ, ଗ୍ରିଡକୋର ସିପିଓ ମହେଶ ଦାସ ଓ ଏମ୍.ଜି.ଏମ୍ ଗ୍ରୀନ୍ ଏନର୍ଜିର ନିର୍ଦ୍ଦେଶକ ତନୁଜ ମହାନ୍ତି ସହିତ ଅନ୍ୟମାନେ ଉପସ୍ଥିତ ଥିଲେ।
୭୫ରୁ ଅଧିକ ପ୍ରଦର୍ଶକ ଓ ସହଭାଗୀଙ୍କ ସହିତ ୧୦ ହଜାରରୁ ଅଧିକ ପରିଦର୍ଶକ ଏହି ଏକ୍ସପୋକୁ ଆସିବେ ବୋଲି ଆଶା କରାଯାଉଛି। ଦୁଇ-ତୃତୀୟାଂଶ ପ୍ରଦର୍ଶକ ଓଡ଼ିଶା ବାହାରରୁ ଆସୁଥିବାବେଳେ ପ୍ରାୟ ୮୦ଟି ପ୍ରମୁଖ କମ୍ପାନୀ ଅଂଶଗ୍ରହଣ କରିବେ। ସୌର ଶକ୍ତି, ଶକ୍ତି ସଂରକ୍ଷଣ, ବୈଦ୍ୟୁତିକ ଯାନ (EV), ବ୍ୟାଟେରୀ ପୁନଃଚକ୍ରଣ, EV ଚାର୍ଜିଂ ଭିତ୍ତିଭୂମି ସହିତ ସ୍ଥାୟୀ ପ୍ରଯୁକ୍ତି ବିଭିନ୍ନ କ୍ଷେତ୍ର ଏହି ପ୍ରଦର୍ଶନୀରେ ଦେଖାଯିବ। ୧୦ରୁ ଅଧିକ ନୂତନ ଷ୍ଟାର୍ଟଅପ୍କୁ ନେଇ ଏକ ବିଶେଷ ଷ୍ଟାର୍ଟଅପ୍ ଜୋନ୍ ମଧ୍ୟ ରହିବ।
ଆୟୋଜକମାନଙ୍କ କହିବାନୁସାରେ, ଏହି କାର୍ଯ୍ୟକ୍ରମ ଓଡ଼ିଶା ଓ ପୂର୍ବ ଭାରତରେ ନୂତନ ନିବେଶ ଓ ନବୀକରଣୀୟ ଶକ୍ତି ପ୍ରଯୁକ୍ତିକୁ ପ୍ରୋତ୍ସାହନ ଦେବ। ଦୁଇ ଦିନରେ ୫୦୦ରୁ ୧୦୦୦ କୋଟି ଟଙ୍କା ପର୍ଯ୍ୟନ୍ତ ବ୍ୟବସାୟ ସମ୍ଭାବନା ଥିବା ଅନୁମାନ କରାଯାଇଛି। ଏହାକୁ ଆଗାମୀ ଦିନରେ ବାର୍ଷିକ କାର୍ଯ୍ୟକ୍ରମ ଭାବେ ଆୟୋଜନ କରାଯିବ ବୋଲି ଜଣାପଡ଼ିଛି।
ଏହି ଅବସରରେ ଓଡ଼ିଶାର ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହ ଦେଓ ମୁଖ୍ୟ ଅତିଥି ଭାବେ ଯୋଗଦେବେ। ଶକ୍ତି ବିଭାଗ, ଓଡ଼ିଶା ସରକାର ଏବଂ GRIDCO ଦ୍ୱାରା କାର୍ଯ୍ୟକ୍ରମକୁ ସମର୍ଥନ ମିଳିଛି। NetZero Energy Transition Association (NETRA) ଓ Odisha Cleantech Association (OCTA) ଯୁଗଳଭାବେ ଏହାକୁ ପରିଚାଳନା କରୁଛନ୍ତି।
୫୦ରୁ ଅଧିକ ଅନ୍ତର୍ଜାତୀୟ ବକ୍ତାଙ୍କ ସହିତ ୧୦ରୁ ଅଧିକ ଅଧିବେଶନ ଥିବା ଉଚ୍ଚସ୍ତରୀୟ ସମ୍ମିଳନୀ ମଧ୍ୟ ଆୟୋଜିତ ହେବ। ୨୦ ଫେବୃଆରୀରେ ‘ଗ୍ଲୋବାଲ୍ କ୍ଲିନ୍ଟେକ୍ ଉତ୍କର୍ଷ ପୁରସ୍କାର – ଓଡ଼ିଶା ସଂସ୍କରଣ’ ପ୍ରଦାନ ସହ କାର୍ଯ୍ୟକ୍ରମର ସମାପନ ହେବ।
ଏହି ଏକ୍ସପୋ ମାଧ୍ୟମରେ ଓଡ଼ିଶାକୁ କ୍ଲିନ୍ଟେକ୍ କ୍ଷେତ୍ରରେ ଏକ ମୁଖ୍ୟ କେନ୍ଦ୍ର ଭାବେ ସ୍ଥାପିତ କରିବା ଲକ୍ଷ୍ୟ ରହିଛି।
