ପୁରୀ, ୧୪ /୮/୨୦୨୫ (ତୃପ୍ତିମୟୀ ଜେନା)— ପୁରୀ ବକ୍ସିଂ ଏକାଡେମୀର ପ୍ରତିଷ୍ଠାତା ଓ କ୍ରୀଡା ପ୍ରେମୀ ସୁଦର୍ଶନ ସାହୁ ଗତକାଲି ପୁରୀ ଠାରେ ମାନ୍ୟବର କେନ୍ଦ୍ର ଶିକ୍ଷାମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମ୍ମୁଖରେ ଏକ ପ୍ରସ୍ତାବ ପତ୍ର ଅର୍ପଣ କରିଛନ୍ତି। ଉକ୍ତ ପ୍ରସ୍ତାବ ପତ୍ରରେ ଉଲ୍ଲେଖ ଅଛି ଯେ, ଶ୍ରୀ ଜଗନ୍ନାଥ ସଂସ୍କୃତ ବିଶ୍ୱବିଦ୍ୟାଳୟ, ପୁରୀ ଓ ଏହାର ସଂଲଗ୍ନ ବିଦ୍ୟାଳୟ ଏବଂ ମହାବିଦ୍ୟାଳୟଗୁଡ଼ିକରେ ଅନେକ କ୍ରୀଡାପ୍ରତିଭାଶାଳୀ ଯୁବ-ଯୁବତୀ ପଢ଼ୁଥିଲେ ସତ୍ତ୍ୱେ, SGFI (School Games Federation of India) ଓ AIU (Association of Indian Universities) ଭଳି ଜାତୀୟ କ୍ରୀଡା ପ୍ରତିଯୋଗିତାରେ ଅଂଶଗ୍ରହଣ କରୁନାହାନ୍ତି। ଏହି ପରିପ୍ରେକ୍ଷିତରେ, SGFI ଓ AIU ସହିତ ବିଶ୍ୱବିଦ୍ୟାଳୟର ପଞ୍ଜିକରଣ ସୁନିଶ୍ଚିତ କରିବା ଓ ଛାତ୍ରଛାତ୍ରୀଙ୍କୁ ଆବଶ୍ୟକ ସୂଚନା, ପ୍ରଶିକ୍ଷଣ ଓ ସହଯୋଗ ପ୍ରଦାନ କରିବା ପାଇଁ କେନ୍ଦ୍ର ସରକାରଙ୍କୁ ପଦକ୍ଷେପ ଗ୍ରହଣ କରିବାକୁ ସଭ୍ୟଭାବେ ଅନୁରୋଧ କରାଯାଇଛି।
ସୁଦର୍ଶନ ସାହୁଙ୍କ ଅଭିମତ:
“ସଂସ୍କୃତ ପାଠଶାଳାର ଯୁବଶକ୍ତି କେବଳ ପାଣିନିୟ ବ୍ୟାକରଣରେ ନୁହେଁ, ବରଂ କ୍ରୀଡାରେ ମଧ୍ୟ ସାଧନା କରିପାରିବେ। ସୁବିଧା ଓ ସହଯୋଗ ମିଳିଲେ ସେମାନଙ୍କ ପ୍ରତିଭା ଜାତୀୟ ମଞ୍ଚରେ ପ୍ରକାଶିତ ହେବ, ଯାହା ସେମାନଙ୍କ ସମଗ୍ର ବିକାଶରେ ମହତ୍ୱପୂର୍ଣ୍ଣ ଭୂମିକା ନିବାହ କରିବ।”
