ପୁରୀ:୨୩/୧୨/୨୦୨୫ -ପୁରୀ ଜିଲ୍ଲାର ସମୁଦ୍ରତଟୀୟ ଅଞ୍ଚଳର ସୁରକ୍ଷା ବ୍ୟବସ୍ଥାକୁ ସୁଦୃଢ଼ କରିବା ଓ ସାଧାରଣ ଜନତାଙ୍କ ସହ ପୁଲିସ୍ର ସମ୍ପର୍କକୁ ଆହୁରି ମଜବୁତ କରିବା ଉଦ୍ଦେଶ୍ୟରେ ଏସ୍ପି ପୁରୀ ଶ୍ରୀ ପ୍ରତୀକ ସିଂହଙ୍କ ନିର୍ଦ୍ଦେଶନାୟ ଆଜି ଅସ୍ତରଙ୍ଗ ମେରାଇନ୍ ପୋଲିସ୍ ଷ୍ଟେସନ୍ରେ କୋଷ୍ଟାଲ୍ ସେକ୍ୟୁରିଟି କମ୍ୟୁନିଟି ପୋଲିସିଙ୍ଗ୍ କାର୍ଯ୍ୟକ୍ରମ ସଫଳତାର ସହ ଆୟୋଜିତ ହୋଇଥିଲା।
ଏହି କାର୍ଯ୍ୟକ୍ରମର ମୁଖ୍ୟ ଲକ୍ଷ୍ୟ ଥିଲା ସମୁଦ୍ରତଟୀୟ ଅଞ୍ଚଳର ଲୋକମାନଙ୍କୁ ସଚେତନ କରିବା, ବିପଦ ସମୟରେ ସ୍ଥାନୀୟ ସମୁଦାୟଙ୍କ ସହଯୋଗ ସୁନିଶ୍ଚିତ କରିବା ଏବଂ ଯୁବପିଢ଼ୀଙ୍କୁ ସକାରାତ୍ମକ କାର୍ଯ୍ୟକଳାପରେ ଅନୁପ୍ରେରିତ କରିବା।
କାର୍ଯ୍ୟକ୍ରମ ଅବସରରେ ଭଲିବଲ୍ ମ୍ୟାଚ୍, ଚିତ୍ରାଙ୍କନ ପ୍ରତିଯୋଗିତା, ଗୀତ ଓ ନୃତ୍ୟ ପ୍ରଦର୍ଶନ ସହ କବିତା ଓ ଭାଷଣ ପ୍ରତିଯୋଗିତା ଆୟୋଜିତ ହୋଇଥିଲା। ପିଲାମାନେ ସମୁଦ୍ର ସୁରକ୍ଷା, ପରିବେଶ ସୁରକ୍ଷା ଓ କମ୍ୟୁନିଟି ପୋଲିସିଙ୍ଗ୍ ଭିଷୟରେ ସୃଜନାତ୍ମକ ଚିନ୍ତାଧାରା ପ୍ରଦର୍ଶନ କରିଥିଲେ।
ଅସ୍ତରଙ୍ଗ ମେରାଇନ୍ ପୋଲିସ୍ ଷ୍ଟେସନ୍ର ଆଇଆଇସି ଶ୍ରୀ ଅଚ୍ୟୁତାନନ୍ଦ ବେହେରାଙ୍କ ଦ୍ୱାରା ବିଭିନ୍ନ ପ୍ରତିଯୋଗିତାର ବିଜେତା ଛାତ୍ରଛାତ୍ରୀମାନଙ୍କୁ ପୁରସ୍କାର ପ୍ରଦାନ କରାଯାଇଥିଲା। ସେଥିସହ ସ୍ଥାନୀୟ ଆବଶ୍ୟକତାପୂର୍ଣ୍ଣ ଲୋକମାନଙ୍କୁ କମ୍ବଳ ବଣ୍ଟନ ଓ ସ୍କୁଲ୍ ଏବଂ ଯୁବସଂଗଠନମାନଙ୍କୁ ସଙ୍ଗୀତ ସାମଗ୍ରୀ ପ୍ରଦାନ କରାଯାଇଥିଲା।
କାର୍ଯ୍ୟକ୍ରମ ଅବସରରେ ଏକ ସ୍ୱାସ୍ଥ୍ୟ ଶିବିର ମଧ୍ୟ ଆୟୋଜିତ ହୋଇଥିଲା, ଯାହାରେ ଶତାଧିକ ସ୍ଥାନୀୟ ଲୋକ ଚିକିତ୍ସା ପରୀକ୍ଷା ଓ ମୂଳ ଔଷଧ ସେବା ଲାଭ କରିଥିଲେ।
ଏହି ପ୍ରୟାସ ଦ୍ୱାରା ସମୁଦ୍ରତଟୀୟ ଅଞ୍ଚଳରେ ପୁଲିସ୍ ଓ ସାଧାରଣ ଜନତାଙ୍କ ମଧ୍ୟରେ ବିଶ୍ୱାସ, ସହଯୋଗ ଓ ସଚେତନତା ଆହୁରି ବୃଦ୍ଧି ପାଇଥିଲା। କାର୍ଯ୍ୟକ୍ରମରେ ଅସ୍ତରଙ୍ଗ ମେରାଇନ୍ ପୋଲିସ୍, ସ୍ଥାନୀୟ ଲୋକପ୍ରତିନିଧି ଓ ଅନ୍ୟ ସଦସ୍ୟମାନେ ଉପସ୍ଥିତ ରହିଥିଲେ।
ପୁରୀ ପୋଲିସ୍ ଆଗାମୀ ଦିନରେ ମଧ୍ୟ ଏପରି କମ୍ୟୁନିଟି କେନ୍ଦ୍ରିକ କାର୍ଯ୍ୟକ୍ରମ ମାଧ୍ୟମରେ ସୁରକ୍ଷିତ, ସଜାଗ ଓ ସଶକ୍ତ ସମାଜ ଗଠନ ପାଇଁ ପ୍ରତିବଦ୍ଧ ରହିବ।
