ପୁରୀ ଜିଲ୍ଲା ବ୍ରହ୍ମଗିରି ପୋଲିସ ଅବୈଧ ନିଶାଦ୍ରବ୍ୟ ବ୍ୟବସାୟ ବିରୋଧରେ ବଡ଼ ସଫଳତା ହାସଲ କରିଛି। ପୋଲିସ ୯ କେଜି ୫୦୦ ଗ୍ରାମ ଗଞ୍ଜେଇ ଜବତ କରିଥିବା ସହିତ ଏହି ଘଟଣାରେ ଜଡିତ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଛି। ସୂଚନା ଅନୁସାରେ, ୭ ମାର୍ଚ୍ଚ ୨୦୨୬ ରାତି ପ୍ରାୟ ୮ଟା ୫୪ ମିନିଟ ସମୟରେ ବ୍ରହ୍ମଗିରି ଥାନାର ସବ୍-ଇନ୍ସପେକ୍ଟର ଶ୍ରୀକାନ୍ତ ସାହୁଙ୍କୁ ଭରସାଯୋଗ୍ୟ ସୂଚନା ମିଳିଥିଲା ଯେ, ଦୁଇ ଜଣ ବ୍ୟକ୍ତି ଏକ ବୋରି ବ୍ୟାଗରେ ଗଞ୍ଜେଇ ନେଇ ବାଲିହରିଚଣ୍ଡୀ ଅଞ୍ଚଳ ଦିଗକୁ ଯାଉଛନ୍ତି ଏବଂ ସେମାନେ ଏହାକୁ ନିଶା ବ୍ୟବସାୟୀମାନଙ୍କୁ ବିକ୍ରି କରିବା ପାଇଁ ନେଉଥିବା ଅଭିଯୋଗ ଥିଲା।
ଏହି ସୂଚନା ପାଇବା ପରେ ବ୍ରହ୍ମଗିରି ପୋଲିସ ତୁରନ୍ତ ଏକ ଟିମ୍ ଗଠନ କରି ଉକ୍ତ ସ୍ଥାନରେ ଚଢ଼ାଉ କରିଥିଲା। ଚଢ଼ାଉ ସମୟରେ ଦୁଇ ଜଣ ସନ୍ଦେହଭାଜନ ବ୍ୟକ୍ତିଙ୍କୁ ଧରାଯାଇଥିଲା ଏବଂ ତାଙ୍କ ପାଖରୁ ଗଞ୍ଜେଇ ଜବତ ହୋଇଥିଲା। ସ୍ୱାଧୀନ ସାକ୍ଷୀ ଓ ଏକ୍ସିକ୍ୟୁଟିଭ୍ ମେଜିଷ୍ଟ୍ରେଟଙ୍କ ଉପସ୍ଥିତିରେ ଆଇନସମ୍ମତ ଭାବେ ତଲାଶି ଓ ଜବତି କାର୍ଯ୍ୟ କରାଯାଇଥିଲା। ଗିରଫ ଅଭିଯୁକ୍ତମାନେ ହେଲେ – ରବୀନ୍ଦ୍ର କୁମାର ମହାପାତ୍ର ଅର୍ଫେ ରବି (୫୦), ପିତା ସ୍ୱର୍ଗତ କାଶୀନାଥ ମହାପାତ୍ର, ଗ୍ରାମ ବୈସିବାଟି, ଥାନା ବ୍ରହ୍ମଗିରି, ଜିଲ୍ଲା ପୁରୀ। ସନ୍ତୋଷ କୁମାର ମିଶ୍ର (୪୩), ପିତା ସ୍ୱର୍ଗତ କାନ୍ହୁ ଚରଣ ମିଶ୍ର, ଗ୍ରାମ ବେଣ୍ଟାପୁର ବ୍ରାହ୍ମଣ ସାହି, ଥାନା ବ୍ରହ୍ମଗିରି, ଜିଲ୍ଲା ପୁରୀ। ପୋଲିସ ତାଙ୍କ ନିକଟରୁ ୬ କେଜି ୨୦୦ ଗ୍ରାମ ଓ ୩ କେଜି ୩୦୦ ଗ୍ରାମ ମିଶାଇ ମୋଟ ୯ କେଜି ୫୦୦ ଗ୍ରାମ ଗଞ୍ଜେଇ, ୧୭ ହଜାର ଟଙ୍କା ନଗଦ ଓ ଗୋଟିଏ ମୋବାଇଲ୍ ଫୋନ୍ ଜବତ କରିଛି।
ଏହି ଘଟଣାରେ ବ୍ରହ୍ମଗିରି ଥାନାରେ ମାମଲା ନମ୍ବର ୧୦୮, ତାରିଖ ୦୭.୦୩.୨୦୨୬ ରେ ଏନ୍ଡିପିଏସ୍ ଆଇନର ଧାରା 20(b)(ii)(B) ଅନୁଯାୟୀ ମାମଲା ରୁଜୁ କରାଯାଇଛି। ଦୁଇ ଅଭିଯୁକ୍ତଙ୍କୁ ଗିରଫ କରି ଆଜି ଆଦାଲତରେ ପେଶ କରାଯାଇଛି।
ପୁରୀ ପୋଲିସ ଜିଲ୍ଲାରେ ଅବୈଧ ନିଶାଦ୍ରବ୍ୟ ବ୍ୟବସାୟ ଓ ମାଦକଦ୍ରବ୍ୟ ଚାଲାଣ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଜାରି ରଖିବ ବୋଲି ପୁନରୁକ୍ତି କରିଛି।
