ଶେଷ ହେଲା ୫ ଦିନିଆ ମେଗା କ୍ରୀଡ଼ା ପ୍ରତିଯୋଗିତା

କେନ୍ଦୁଝର: ୨୨/୦୪/୨୦୨୫ -ନି:ପ୍ର- କେନ୍ଦୁଝର ଧରଣୀଧର ବିଶ୍ୱବିଦ୍ୟାଳୟ ପକ୍ଷରୁ ଆୟୋଜିତ ଓଡ଼ିଶା ଆନ୍ତଃ ବିଶ୍ୱବିଦ୍ୟାଳୟ କ୍ରୀଡ଼ା ପ୍ରତିଯୋଗିତା ଏପ୍ରିଲ ୨୦ ତାରିଖରେ ଶେଷ ହୋଇଛି। ଓଡ଼ିଶା ସରକାରଙ୍କ ଉଚ୍ଚଶିକ୍ଷା ବିଭାଗ ସହଯୋଗରେ ଆୟୋଜିତ ଏହି ମେଗା ଇଭେଣ୍ଟରେ କ୍ରିକେଟ, ହକି, ଫୁଟବଲ, ବ୍ୟାଡମିଣ୍ଟନ, ଖୋ ଖୋ କବାଡି, ଟେବୁଲ ଟେନିସ, କ୍ୟାରମ୍ ଓ ଚେସ୍ ଭଳି ଆଉଟଡୋର୍ ଓ ଇନ୍ ଡୋର କ୍ରୀଡ଼ା ଅନୁଷ୍ଠିତ ହୋଇଥିଲା। ସମସ୍ତ ଖେଳ ପୁରୁଷ ଓ ମହିଳା ବର୍ଗରେ ଅନୁଷ୍ଠିତ ହୋଇଥିଲା। ସିଙ୍ଗଲ୍ସ ଓ ଡବଲ୍ସ ବର୍ଗରେ ମଧ୍ୟ ବ୍ୟାଡମିଣ୍ଟନ ଅନୁଷ୍ଠିତ ହୋଇଥିଲା। ଏହି କାର୍ଯ୍ୟକ୍ରମରେ ୨000ରୁ ଅଧିକ ଛାତ୍ରଛାତ୍ରୀ ଥିବା ମୋଟ ୧୩ଟି ବିଶ୍ୱବିଦ୍ୟାଳୟ (ଆୟୋଜକଙ୍କୁ ମିଶାଇ) ଅଂଶଗ୍ରହଣ କରିଥିଲେ। କେନ୍ଦୁଝର ସାଂସଦ ଅନନ୍ତ ନାୟକ, ବିଧାୟକ ଫକୀରମୋହନ ନାୟକ, ଅଖିଳ ଚରଣ ନାୟକ, ସନାତନ ମହାକୁଡ଼ ଓ ଜିଲ୍ଲାପାଳ ବିଶାଲ ସିଂହଙ୍କ ଉପସ୍ଥିତିରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କେନ୍ଦୁଝରର ଧରଣୀଧର ସ୍ପୋର୍ଟସ କମ୍ପ୍ଲେକ୍ସରେ ଏହି କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ।

ସମାପନୀ ଉତ୍ସବରେ ବିଶିଷ୍ଟ ଆଥଲେଟ୍ ତଥା ଅଲିମ୍ପିଆନ୍ ଦୂତି ଚାନ୍ଦ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। କ୍ରୀଡ଼ାପ୍ରତି ସକ୍ରିୟ ଆଗ୍ରହ ପ୍ରକାଶ କରିବାକୁ ଚାନ୍ଦ ଛାତ୍ରଛାତ୍ରୀଙ୍କୁ ଉତ୍ସାହିତ କରିଥିଲେ। ବିଭିନ୍ନ ବିଶ୍ୱବିଦ୍ୟାଳୟ ବିଭିନ୍ନ ବର୍ଗରେ ପୁରସ୍କାର ପାଇଥିବା ବେଳେ ଉତ୍କଳ ବିଶ୍ୱବିଦ୍ୟାଳୟ ୧୧ଟି ବର୍ଗରେ ଚାମ୍ପିୟନ ହୋଇଥିବା ବେଳେ ୬ଟି ବିଭାଗରେ ଉପବିଜେତା ହୋଇଛି। ସମ୍ବଲପୁର ବିଶ୍ୱବିଦ୍ୟାଳୟ ୮ଟିରେ ଚାମ୍ପିୟନ ହୋଇଥିବା ବେଳେ ୮ଟିରେ ଉପବିଜେତା ହୋଇଥିଲା। ଖୋ ଖୋ (ମହିଳା) ଓ ଟେବୁଲ ଟେନିସ (ପୁରୁଷ) ରେ ଆୟୋଜକ ବିଶ୍ୱବିଦ୍ୟାଳୟ ଦ୍ବିତୀୟ ଉପବିଜେତା ହୋଇଛି। ଆଉଟଡୋର୍ ଗେମ୍ ବିଜେତାଙ୍କୁ ୫୦ ହଜାର ଟଙ୍କାର ପୁରସ୍କାର ରାଶି ପ୍ରଦାନ କରାଯାଇଥିଲା। ଗ୍ରୁପ୍ ଇଭେଣ୍ଟପାଇଁ ପ୍ରଥମ ଉପବିଜେତାଙ୍କୁ ୪୦,୦୦୦ ଓ ଦ୍ବିତୀୟ ଉପବିଜେତାଙ୍କୁ ୨୫,୦୦୦ ପୁରସ୍କାର ମିଳିଥିଲା। ବ୍ୟକ୍ତିଗତ ଇଭେଣ୍ଟରେ ବିଜେତା, ପ୍ରଥମ ଉପବିଜେତା ଏବଂ ଦ୍ବିତୀୟ ଉପବିଜେତାଙ୍କୁ ଯଥାକ୍ରମେ ୩୦, ୦୦୦, ୧୫,୦୦୦ ଓ ୧୦,୦୦୦ ଟଙ୍କା ପ୍ରଦାନ କରାଯାଇଥିଲା। କେନ୍ଦୁଝର ଜିଲ୍ଲାର ୫ ଜଣ ବିଶିଷ୍ଟ କ୍ରୀଡ଼ାବିତ୍ ଶୁଭ୍ରାଂଶୁ ସେନାପତି (କ୍ରିକେଟ୍), ବବଲୁ ମୁଣ୍ଡା (ସମର କଳା), ପାର୍ବତୀ ମହାନ୍ତ, ରେଣୁବାଳା ମହାନ୍ତ ଓ ସୁକାବତୀ ମହାନ୍ତ (ଦୌଡ଼ କୁଦ)ଙ୍କୁ ନିଜ ନିଜ କ୍ଷେତ୍ରରେ ସଫଳତା ପାଇଁ ସମ୍ବର୍ଦ୍ଧିତ କରାଯାଇଥିଲା। ଧରଣୀଧର ବିଶ୍ୱବିଦ୍ୟାଳୟର ପୂର୍ବତନ ଛାତ୍ରୀ ତଥା ଅଭିନେତ୍ରୀ ମଧୁସ୍ମିତା ସୁତାରଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା।

ଏହି ଅବସରରେ ଧରଣୀଧର ବିଶ୍ୱବିଦ୍ୟାଳୟର ଓଏସ୍ଡି ତଥା କୁଳପତି ପ୍ରଫେସର ପ୍ରତାପ କୁମାର ମହାନ୍ତି ବିଜେତାଙ୍କୁ ଅଭିନନ୍ଦନ ଜଣାଇବା ସହ ଆନ୍ତଃ ବିଶ୍ୱବିଦ୍ୟାଳୟ କ୍ରୀଡ଼ା ଓ କ୍ରୀଡ଼ାର ସଫଳତାରେ ସକ୍ରିୟ ଯୋଗଦାନ କରିଥିବାରୁ ସମସ୍ତ ଦଳ ଓ ସହଯୋଗ ଏବଂ ଶୁଭକାମନା ନିମନ୍ତେ ରାଜ୍ୟ ସରକାର, ଜିଲ୍ଲା ପ୍ରଶାସନ ଓ କେନ୍ଦୁଝରବାସୀଙ୍କୁ ଧନ୍ୟବାଦ ଜଣାଇଥିଲେ। ମାନସିକ ଓ ଶାରୀରିକ ସୁସ୍ଥତା ତଥା ଦେଶର ବୃହତ୍ତର ସ୍ୱାର୍ଥ ପାଇଁ କ୍ରୀଡ଼ାକୁ ଦୈନନ୍ଦିନ ଜୀବନର ଏକ ଅଂଶ ଭାବେ ଅନ୍ତର୍ଭୁକ୍ତ କରିବା ଉପରେ ବିଶ୍ୱବିଦ୍ୟାଳୟର ରେଜିଷ୍ଟ୍ରାର ଡ. ଶଶିକାନ୍ତ ଜେନା ଗୁରୁତ୍ୱାରୋପ କରିଥିଲେ। ନୋଡାଲ ଅଫିସର ଡାକ୍ତର ଦାମୋଦର ସାହୁ ଧନ୍ୟବାଦ ଅର୍ପଣ କରିଥିଲେ। ପୁରସ୍କାର ବିତରଣ ଉତ୍ସବରେ ଧରଣୀଧର ବିଶ୍ୱବିଦ୍ୟାଳୟର କ୍ରୀଡ଼ା ପରିଷଦ ସଚିବ ବିଜୟ କୁମାର ଦାସ ଅନ୍ୟ ମାନ୍ୟଗଣ୍ୟ ବ୍ୟକ୍ତିଙ୍କ ସହ ମଞ୍ଚ ପରିବେଷଣ କରିଥିଲେ। ସମାଜବିଜ୍ଞାନ ବିଭାଗର ଡ. ସଙ୍ଗୀତା ସୁଶ୍ରୀ ନାୟକ ଓ ପ୍ରାଣୀ ବିଜ୍ଞାନ ବିଭାଗର ଡ. ଜୟଲକ୍ଷ୍ମୀ ମହାପାତ୍ର କାର୍ଯ୍ୟକ୍ରମକୁ ସଂଯୋଜନା କରିଥିଲେ।