ଗୋପ, ୨୫ ଜାନୁଆରୀ: – ପୁରୀ ଜିଲ୍ଲାର ଗୋପ ବ୍ଲକ୍ ଅନ୍ତର୍ଗତ କୁଶଭଦ୍ରା ନଦୀ କୂଳରେ ଦିନରାତି ଚାଲିଥିବା ଅବୈଧ ବାଲି ଓ ମାଟି ଉତ୍ତୋଳନ ସହ ଅନୈତିକ ଇଟାଭାଟି କାର୍ଯ୍ୟକଳାପ ଯୋଗୁଁ ସ୍ଥାନୀୟ କୃଷକମାନଙ୍କ ଜୀବନଜୀବିକା ଗୁରୁତର ସଙ୍କଟରେ ପଡ଼ିଛି। ଏହି ଅବୈଧ କାର୍ଯ୍ୟକଳାପ ରାଜ୍ୟ ସରକାରଙ୍କ ନିୟମ ଓ ପରିବେଶ ଆଇନର ଘୋର ଉଲ୍ଲଂଘନ ବୋଲି ଅଭିଯୋଗ ହେଉଛି।
ଗୋପ ତହସିଲ୍ ଅନ୍ତର୍ଗତ କୁଶୁପୁର ଅଞ୍ଚଳରେ କୁଶଭଦ୍ରା ନଦୀ କୂଳରୁ ବାଲି ମାଫିଆମାନେ ଗୋପନରେ ବାଲି ଓ ମାଟି ଉତ୍ତୋଳନ କରି ଟ୍ରାକ୍ଟର୍ ମାଧ୍ୟମରେ ବିଭିନ୍ନ ସ୍ଥାନକୁ ପରିବହନ କରୁଥିବା ଅଭିଯୋଗ ଉଠିଛି। ସ୍ଥାନୀୟ ବାସିନ୍ଦା ଓ କୃଷକମାନେ ଏହାର ବିରୋଧ କରି ରାଜସ୍ୱ ବିଭାଗ ଓ ପ୍ରଶାସନକୁ ଅବଗତ କରାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ଫଳପ୍ରଦ କାର୍ଯ୍ୟାନୁଷ୍ଠାନ ନିଆଯାଇନଥିବା ଅଭିଯୋଗ ହେଉଛି।
ଅଭିଯୋଗ ଅନୁଯାୟୀ, ଅବୈଧ ଇଟାଭାଟି ବିରୋଧରେ ସ୍ୱର ଉଠାଇଥିବା କୃଷକ ଓ ସାମାଜିକ କର୍ମୀମାନଙ୍କୁ ମାଫିଆମାନେ ଆକ୍ରମଣ କରୁଛନ୍ତି। କୁଶୁପୁର ଅଞ୍ଚଳରେ ନଦୀକୂଳରେ ଚାଲିଥିବା ଅନୈତିକ ଇଟାଭାଟି ବିରୋଧରେ ପ୍ରତିବାଦ କରିଥିବା କୃଷକମାନଙ୍କୁ ଆକ୍ରମଣ କରାଯାଇଥିବା ଘଟଣା ମଧ୍ୟ ସାମ୍ନାକୁ ଆସିଛି।
ଏହି ଅବୈଧ ଇଟାଭାଟିରୁ ନିର୍ଗତ ବିଷାକ୍ତ ଧୁଆଁ ଓ ପରିବେଶ ଦୂଷଣ ଯୋଗୁଁ ପରାଗସଂଗମ (ପୋଲିନେସନ୍) ପ୍ରକ୍ରିୟା ଭାରି ଭାବେ ବାଧାପ୍ରାପ୍ତ ହେଉଛି। ଫଳସ୍ୱରୂପ ପାରିବା ଚାଷରେ ପ୍ରାୟ ୩୩ ପ୍ରତିଶତ ପର୍ଯ୍ୟନ୍ତ ଉତ୍ପାଦନ ହାନି ହେଉଥିବା କୃଷକମାନେ କହିଛନ୍ତି। ଚାଷୀମାନେ ଯେଉଁଠାରେ ନିଜ ଜୀବିକା ପାଇଁ ଖେତରେ ହାଡ଼ଭାଙ୍ଗା ପରିଶ୍ରମ କରୁଛନ୍ତି, ସେଠାରେ ଇଟା ମାଫିଆମାନେ ନଦୀର ପ୍ରାକୃତିକ ସମ୍ପଦକୁ ଲୁଟି ନେଇ ପରିବେଶ ସନ୍ତୁଳନକୁ ଧ୍ୱଂସ କରୁଛନ୍ତି ବୋଲି ଅଭିଯୋଗ ହେଉଛି। କୁଶୁପୁର ଅଞ୍ଚଳର ପ୍ରକାଶ ପାଇକରାୟ (ବୁଢ଼ା) ଏହି ଅବୈଧ ଇଟାଭାଟି କାର୍ଯ୍ୟର ମୁଖ୍ୟ ସଂଚାଳକ ଭାବେ ଅଭିଯୁକ୍ତ ବୋଲି ସାଧାରଣରେ ଅଭିଯୋଗ ହେଉଛି।
ଏହି ଘଟଣା ସନ୍ଦର୍ଭରେ ବିଜେପି କୃଷକ ମୋର୍ଚ୍ଚା ଓଡ଼ିଶାର ରାଜ୍ୟ ସମ୍ପାଦକ ଶ୍ରୀ ପ୍ରଶାନ୍ତ କୁମାର ସ୍ୱାଇଁ କହିଛନ୍ତି ଯେ, ଗୋପ ବ୍ଲକ୍ ପ୍ରଶାସନକୁ ଏହି ଅବୈଧ କାର୍ଯ୍ୟକଳାପ ତୁରନ୍ତ ବନ୍ଦ କରିବାକୁ ଅନୁରୋଧ କରାଯାଇଛି। କିନ୍ତୁ କିଛି ଅସାଧୁ ସରକାରୀ କର୍ମଚାରୀଙ୍କ ଭୂମିକା ସନ୍ଦେହଜନକ ବୋଲି ସେ ଅଭିଯୋଗ କରିଛନ୍ତି। ତହସିଲଦାର ଗୋପ ଓ ରାଜସ୍ୱ ନିରୀକ୍ଷକ (ଆର୍ଆଇ) ସମ୍ପର୍କିତ ଅଡିଓ ରେକର୍ଡିଂ ଏବଂ ଅଭିଯୋଗ ପତ୍ର ଥିବା ଉଲ୍ଲେଖ କରି ସେ କହିଛନ୍ତି ଯେ, ଏହି ମାମଲାରେ ତୁରନ୍ତ ନିରପକ୍ଷ ତଦନ୍ତ ଓ କଠୋର କାର୍ଯ୍ୟାନୁଷ୍ଠାନ ଆବଶ୍ୟକ।
ଶ୍ରୀ ସ୍ୱାଇଁ ଜିଲ୍ଲାପାଳ ଓ ଉଚ୍ଚ ପ୍ରଶାସନିକ ଅଧିକାରୀମାନଙ୍କୁ ଅବୈଧ ଇଟାଭାଟିଗୁଡ଼ିକୁ ତୁରନ୍ତ ଧ୍ୱଂସ କରି କୃଷକଙ୍କ ଜୀବିକାକୁ ସୁରକ୍ଷା ଦେବାକୁ ଦାବି କରିଛନ୍ତି।
ଏହି ଘଟଣା ପରିବେଶ ସୁରକ୍ଷା, ଆଇନର ଶାସନ ଓ କୃଷକଙ୍କ ଅଧିକାରକୁ ନେଇ ଗଭୀର ପ୍ରଶ୍ନ ଉଠାଇଛି। ସ୍ଥାନୀୟ ପ୍ରଶାସନର ନିଷ୍କ୍ରିୟତା ଯଦି ଏଭଳି ଚାଲିଥାଏ, ତେବେ ମାଫିଆମାନଙ୍କ ଦୌରାତ୍ମ୍ୟ ଆହୁରି ବଢ଼ିବ ବୋଲି ସାଧାରଣ ଲୋକ ଆଶଙ୍କା ପ୍ରକାଶ କରିଛନ୍ତି। ରାଜ୍ୟ ସରକାର ଏହି ମାମଲାରେ ତୁରନ୍ତ ହସ୍ତକ୍ଷେପ କରି କଠୋର ପଦକ୍ଷେପ ନେବାକୁ ସାଧାରଣ ଦାବି ଜୋର ଧରିଛି।
